Cynhaliwyd noson gyda bandiau roc Cymraeg nos Wener yn Neuadd Fictoria, Llanbed dan nawdd ‘Celf Llanbed’. Y bandiau dan sylw oedd Ysgol Sul a Mellt.
Mor braf oedd cael mynychu’r hen neuadd a welodd grwpiau gorau Cymru yn perfformio yno dros y blynyddoedd. Pwy sy’n cofio digwyddiadau fel ‘Twrw Tanllyd’ yno a chyffro bandiau fel Louis a’r Rocyrs, Derec Brown a’r Racaracwyr, Jim O’Rourke a’r Hoelion Wyth, Y Ficar, Maffia Mr Huws a Treiglad Pherffaith? Y lle’n dan ei sang bryd hynny.
Mor wahanol oedd noson Ysgol Sul a Mellt nos Wener a hynny oherwydd diffyg presenoldeb Cymry ifanc lleol. Ble’r oedd pawb? Rhyw hanner cant o bobl oedd yno a deugain o’r rheiny yn bobl ddi-Gymraeg canol oed, diolch amdanynt.
Ydy gallu’r ardal hon i drefnu gigs Cymraeg wedi dod i ben? Mae ‘Tregaroc’ yn Nhregaron a ‘Gŵyl Nôl a Mlan’ yn Llangrannog yn ddigwyddiadau llwyddiannus dros ben. Beth oedd y rheswm am ddiffyg diddordeb ieuenctid yr ardal yn y noson hon? A oedd diffyg cyhoeddusrwydd tybed? Peidied neb ag achwyn nad oes dim i’w wneud yn Llanbed o ystyried yr arlwy oedd yn Neuadd Fictoria nos Wener.
Mae Ysgol Sul a Mellt yn fandiau Cymraeg cyfoes. Roedden nhw ymhlith y bandiau mwyaf poblogaidd ym Maes B eleni, a da iawn nhw am berfformio mor broffesiynol yn Llanbed o flaen cynulleidfa digon truenus.
Mor wahanol oedd y noson o ran y neuadd hefyd a hynny er gwell. Mae wedi ei hadnewyddu yn y blynyddoedd diwethaf gyda chegin oedd yn gweini bwyd a bar pwrpasol.
Mae Neuadd Fictoria bellach yn cael ei rhedeg gan y gymuned, sef Ymddiriedolaeth Datblygu Transition Llambed – grŵp menter gymdeithasol nid ar gyfer elw, er budd pobl Llanbed.
Dyma un o’r grwpiau gweithredu a anwyd o Transition Llambed. Mae gan y lle botensial enfawr i hwyluso pob math o weithgareddau, cyfarfodydd a chynadleddau naill ai yn y brif neuadd gyda’i llwyfan ac awditoriwm, y neuadd fechan gyda chegin neu’r ddau gyda’i gilydd.
Yn ychwanegol i hyn, roedd y system sain a ddefnyddiwyd o’r radd flaenaf a goleuadau ac effeithiau mwg arbennig i greu awyrgylch pwrpasol.
Trefnir cerddoriaeth fyw yn Neuadd Fictoria bob mis, gweler y poster. Ac anogaf Celf Llanbed i wahodd Bandiau Cymraeg yma eto. Mae dewis da o fandiau yn ran o’r Sîn Roc Gymraeg bresennol.
Mae angen dod o fan hyn bobl Llanbed! Cofiwch fynychu a mwynhau’r tro nesaf.