A bydd Gŵyl Gwrw a Seidr Llambed ar 16 Chwefror yn codi arian tuag at apêl leol Eisteddfod 2020 a Mind Cymru eleni.
Mae’r holl bwyllgorau apêl yn ardal Papur Bro Clonc wedi eu sefydlu a gweithgareddau yn digwydd o un i un er mwyn codi arian tuag at Eisteddfod Genedlaethol Ceredigion 2020.
Cynhaliwyd y digwyddiad cyntaf yn Llanbed nos Fawrth gyda Noson Stwffio yn y Shapla. Codwyd tua £500 gyda’r nod yn y pen draw o gyrraedd £12,500. Swyddogion y pwyllgor codi arian yn Llanbed yw Ann Bowen Morgan – Cadeirydd; Rhys Bebb Jones – Trysorydd; Carys Lloyd Jones a Carys Davies yn ysgrifenyddion, a Delyth Morgans Phillips yn is-gadeirydd. Y digwyddiad nesaf fydd Cwis a Lluniaeth yn Nhafarn Llain y Castell ar yr 22ain Mawrth.
Ddechrau mis Ionawr cafwyd cyfarfod yn Neuadd Llanfair Clydogau ar gyfer pobl Llanfair a Chellan. Da oedd cael croesawu Arwel Jones i annerch y cyfarfod er mwyn rhoi gwybodaeth ynglŷn â beth a ddisgwylir oddi wrth y pwyllgor a phobl yr ardal gyda syniadau am sut i godi arian. Roedd yn galondid mawr i gael 29 yn bresennol. Mae ardal Llanfair a Chellan yn gorfod codi £2,000 tuag at gronfa’r Eisteddfod.
Cymerwyd y cam cyntaf o drefnu pwyllgor gydag Eleri Davies yn gadeirydd, Lilian Jones yn is-gadeirydd, Aerwen a Dan Griffiths yn ysgrifenyddion, ac Alwen Edwards yn drysorydd. Y digwyddiad cyntaf yw Bore Coffi, Raffl a Chlonc gyda bwrdd yn gwerthu cacennau. Cynhelir hyn ar ddydd Sadwrn, 23ain Chwefror o 11.00 y.b. hyd 1.00 y.p. yn Neuadd Llanfair. Mynediad yn £2 a phlant am ddim.
Cynhaliwyd digwyddiad cyntaf pwyllgor Llanwnnen a Llanwenog yn Neuadd Gorsgoch nos Sadwrn ddiwethaf gyda Noson Stomp a Romp. Y disgwyl yw y bydd y noson wedi codi tua £1,000 at gronfa’r ddau blwyf, gyda mwy na 100 o docynnau wedi eu gwerthu ar gyfer yr adloniant a chaws a gwin a gafwyd. Swyddogion yr ardal hon yw Euros Davies yn gadeirydd; Carol a Wendy Davies Ysgol Dyffryn Cledlyn yn ysgrifenyddion gydag Alwena Williams yn drysorydd.
A nos Fercher y cynhaliwyd cyfarfod cyntaf pwyllgor apêl Llangybi yn Ysgol y Dderi. Enwyd y gronfa yn Gronfa Golwg y Dderi lle y bydd disgwyl codi £2,000. Dewiswyd y swyddogion canlynol: Cadeirydd – Lisa Regan; Is Gadeirydd – Elliw Davies; Ysgrifennydd – Lowri Pugh-Davies; Trysorydd – Trish Lewis. Mae yna drefniadau i gynnal sawl digwyddiad yn yr ardal ac fe gyhoeddir y manylion eto.
Bwrlwm o ddigwyddiadau felly, mewn ardal fechan a chwilfrydedd i gefnogi prifwyl Cymru a gynhelir yn y sir.