gan
Dan ac Aerwen
Mae yn bleser cael ysgrifennu pwtyn byr am bob arlunydd sydd yn byw a gweithio yn ein pentref bychan ni sef Llanfair Clydogau.
Fel mae llawer ohonoch yn gwybod rydym yn cynnal arddangosfa o’n gwaith yn neuadd y pentref yn flynyddol ers rhai blynyddoedd bellach ac yn gobeithio y bydd yn bosib i wneud hynny eto eleni ym mis Awst. Byddwn yn rhoi manylion pellach yn Clonc cyn gynted ac y byddwn yn gallu gwneud y trefniadau.
Mae yn bosib gweld enghreifftiau o waith rhai ohonom ar y wefan facebook.
Dyma fanylion y chweched yng nghyfres #CelfLlanfair a gyhoeddwyd ym Mhapur Bro Clonc.
Sue Powell
Symudodd Sue i Gymru o ardal y Gororau gyda’i gŵr yn 2011 ar ôl ymddeol o ddysgu, i redeg fferm fychan a chanolbwyntio ar ei gwaith celf.
Mae’n defnyddio hen, hen dechneg o ffeltio gwlyb i greu gwaith sy’n adlewyrchu prydferthwch arfordir Cymru, ei adar, bywyd gwyllt a’r defaid.
Mae’n byw a gweithio ym mhentref unigryw Llanfair Clydogau a’i lu o artistiaid, a’i agosrwydd at Fae Ceredigion yn rhoi iddi ysbrydoliaeth hollol gyflawn.
Yn ystod y ddwy flynedd ddiwethaf mae wedi ysgrifennu a chyhoeddi llyfr yn disgrifio ei bywyd ers symud yma, ‘Holding on a Hillside’, ac yn y flwyddyn ddiwethaf mae wedi cael gwahoddiad i lunio cyfres o lyfrau plant gyda’r prif gymeriad, Pipkin, nawr yn cael ei gyhoeddi ar Amazon.
Am ragor o wybodaeth ewch ar ei gwefan.