“Gyda gofid, rhaid imi roi gwybod ichi ar ran y Pwyllgor, bod Sioe Feirch Llanbed 2021 yn cael ei gohirio tan Ebrill 23ain 2022.” Dyna oedd y datganiad a ryddhawyd gan John Green, cadeirydd y pwyllgor ddoe.
Ar ôl monitro rheolau Llywodraeth Cymru ynglŷn â’r Coronafeirws a chysylltu â Chyngor Sir Ceredigion dros yr ychydig fisoedd diwethaf, mae’n amhosibl o dan y rheolau cyfredol i gynllunio a chynnal Sioe ym mis Ebrill 2021.
Esbonia’r datganiad “Mae Cymru ar glo ar hyn o bryd, Rhybudd Lefel 4. Er ei bod yn amhosibl rhagweld beth fydd yn digwydd dros yr ychydig fisoedd nesaf, mae’n edrych yn annhebygol iawn y bydd lefelau rhybudd Llywodraeth Cymru yn dod i ben cyn mis Ebrill, gan fod lefel Rhybudd 1 yn caniatáu ond 30 o bobl i gwrdd yn yr awyr agored. Mae iechyd a diogelwch swyddogion, stiwardiaid, cystadleuwyr a’r gymuned ehangach yn bwysicach ar hyn o bryd.”
Mae Sioe Feirch Llanbed yn un o brif ddigwyddiadau’r byd ceffylau yng Ngwledydd Prydain gyda chystadleuwyr yn mynychu bob blwyddyn o bell ac agos.
Trefnir y sioe flynyddol lwyddiannus hon gan dîm o wirfoddolwyr lleol, a phenderfyniad anodd oedd gohirio eleni eto, ond neges John Green ar ddiwedd ei ddatganiad oedd “Cymerwch ofal, a gobeithiwn eich gweld yn 2022.”