Mynegodd y Cynghorydd Denise Owen ei siom o ddarganfod goleuadau’r Bandstand yn Llanybydder wedi eu rhwygo i’r llawr heddiw.
“Siomedig a dweud y lleiaf!” dywedodd Y Cynghorydd Owen, “Ceisio paratoi popeth ar gyfer cynnau’r goleuadau yn y Ffair Nadolig i ddarganfod bod y goleuadau ar y bandstand wedi cael eu rhwygo i ffwrdd gan rywun.”
Ychwanegodd y Cynghorydd Owen, “Rydyn ni’n bentref bach. Mae pawb yn gwybod bod arian yn dynn ac yn mynd i waethygu, ond rydyn ni’n ymdrechu’n galed i wneud i bethau edrych yn dda. Mae gweithredoedd fel hyn yn bwrw’r stwffin mas ohonoch chi. Gobeithio bod y troseddwyr yn teimlo’n falch o’u gwaith!!!”
Goleuadau LED oedden nhw o amgylch y bandstand yn ei oleuo gyda’r nos. Ni fyddant yn cael eu cyfnewid am rai newydd oherwydd y perygl i’r un peth ddigwydd eto.
Os oes gan unrhyw un wybodaeth gallan nhw gysylltu â’r Cynghorydd Owen neu gysylltu’n syth â Thaclo’r Tacle yn ddienw.
Bydd cynnau goleuadau’r pentref a goleuadau’r goeden Nadolig yn Llanybydder yn digwydd ddydd Sadwrn 3ydd Rhagfyr tua 4.45yp. Bydd marchnad yno o 3.00yp, canu carolau am 4.30yp ac yna’r goleuadau. Bydd diddanwr plant, groto Siôn Corn yn ogystal ag alpacas yno gyda’r cyfan am ddim i blant, gan gynnwys bwyd.