gan
Aled Evans
Terry DaviesCarwyn a Sion yn derbyn geiriau o gyngor oddi wrth y meistri; Aled a Calvin.
Calvin ac Aled ar frig y gamp nol ar ddechrau’r 80au.
Calvin (Rhif 148) yn rasio’r ISDE yng Nghymru nol yn 1983.
Sion yn croesi cors wlyb ar ei feic PAR HOMES.
Carwyn (Rhif 42) ar ei feic Gasgas 350cc.
Aled (Rhif 22) ar frys yn rasio Endiwro Brechfa nol yn 1980-81.
Tros ddeugain mlynedd yn ôl, ar ddechrau’r 1980au, dewiswyd dau fachgen ifanc o ardal Llambed i gynrychioli eu gwlad yn ras ryngwladol beicio modur yr ISDE, yr International Six Days Enduro – sef Olympics y byd rasio Enduro.
Yn ystod y cyfnod hwn, cydnabwyd Calvin Williams ac Aled Williams, y ddau o bentref Cwmann, ymhlith reidwyr enduro gorau’r gamp, a phrofwyd balchder mawr o fewn eu milltir sgwâr bod dau grwt ifanc lleol wedi eu dewis i gystadlu tros eu gwlad ar y llwyfan uchaf. Roedd yn gychwyn ar gyfnod llwyddiannus iawn o gystadlu i’r ddau ac yn benllanw ar y blynyddoedd lawer o ymarfer, hyfforddi, gwella ffitrwydd a datblygu eu doniau ar y beic.
Tros ddeugain mlynedd yn ddiweddarach mae hanes yn ail-adrodd ei hun wrth i ddau athletwr ifanc o ardal Llambed gael eu dewis i rasio ISDE 2024 tros dim Cymru, a hynny allan yn Sbaen ganol mis Hydref.
Fel Calvin ac Aled o’u blaen, mae Sion Evans (19 oed) o Gwmann a Carwyn Rosser (22 oed) o Bentrebach, yn gyflym ennill eu statws fel dau o raswyr ifanc mwyaf disglair y gamp, ac mae’r ddau yn edrych ymlaen yn eiddgar at wisgo crys coch Cymru am y tro cyntaf yn Santiago de Compostela ganol mis Hydref a chystadlu gyda’i gilydd yn erbyn goreuon y Byd Enduro.
Mae Calvin ac Aled y ddau yn parhau i ymddiddori mewn Enduro ac yn cael mwynhad mawr o helpu’r to ifanc ar eu llwybr i frig y gamp. Ca Aled fwynhad mawr yn helpu ei blant, Trystan a Manon, i gystadlu’n llwyddiannus ar draws y wlad ar eu beiciau motocross, tra bo Calvin yn dal i fwynhau rasio ambell Enduro leol ac wrth ei fodd yn rhannu o’i brofiad gan hyfforddi, cynorthwyo ac arwain to ifanc Clwb Enduro Dyfed i gystadlu a datblygu eu crefft yn y gamp. Y ddau yn uchel iawn eu parch o fewn y gymuned Enduro ym Mhrydain a neb yn fwy diolchgar am eu cymorth a’u geiriau o gyngor na Carwyn a Sion, hwythau hefyd yn aelodau balch o Glwb Enduro Dyfed.
Mae Sion a Carwyn wedi teithio i Sbaen erbyn hyn ac am dreulio’r wythnos i ddod yn ymgyfarwyddo ag ardal a thirwedd y ras, gwneud paratoadau i’r beic a’r cit, a cherdded y milltiroedd o gymalau arbennig y byddant yn eu rasio trostynt pan fydd y gystadleuaeth chwe diwrnod yn cychwyn ar ddydd Llun, Hydref 14eg.
Gyda thîm Cymru yn un o 33 o wledydd ar draws y Byd sy’n cystadlu eleni, pob lwc i’r ddau o Lambed allan yn Sbaen, gwnewch eich gorau glas bois, mwynhewch y profiad, a dewch adre’n saff i Lambed i adrodd yr hanes.
Gallwch wylio’r ras yn fyw ar y teledu trwy ddilyn y ddolen isod: