gan
Ifan Meredith
Ar nos Wener, y 10fed o Dachwedd cynhaliwyd Gwobrau Cyfryngau Cymru 2023 dan nawdd Elusen y Newyddiadurwyr a chyhoeddwyd Clonc360 yn enillwyr un o’r categorïau. Roedd y digwyddiad yn gwobrwyo’r goreuon o Newyddiadura Cymru.
“braint bod gwefan fro fel Clonc360 yn cael ei chydnabod mewn cystadleuaeth genedlaethol fel hon.”
Roedd yna amrywiaeth o gategorïau i’w hennill gan sefydliadau ar draws y diwydiant ac yn eu canol oedd Clonc360, gwefan fro unigryw gan y bobl ar gyfer y bobl. Roedd Clonc360 yn un o dri oedd wedi cyrraedd y rownd derfynol ar gyfer gwobr ‘Newyddiaduraeth Gymunedol y flwyddyn’.
Yn ystod y noson, cyhoeddwyd mai eleni yw’r flwyddyn â’r nifer fwyaf o ymgeisiadau ar gyfer y gwobrau.
Bu 10 ohonom i’r cinio gwobrwyo a oedd yn cael ei arwain gan gyflwynydd y BBC Lucy Owen a chyflwynydd newyddion ITV, Johnathan Hill yng Ngwesty’r Parkgate. Roedd yna lu o sefydliadau newyddiadurol o bob cwr o Gymru gan gynnwys y BBC, ITV, S4C a Wales Media.
Cafwyd noson hwylus ac mae Clonc360 yn falch i gael ei henwi’n enillwyr ‘Newyddiaduraeth Gymunedol y flwyddyn 2023’ yng Ngwobrau Cyfryngau Cymru.
“ffodus yn yr ardal hon hefyd bod cymaint o bobl yn darllen ein straeon.”
Yn rhan elfennol o’r wefan fro mae ein darllenwyr a chyfranwyr lleol ac rydym yn ddiolchgar am y gefnogaeth i fod yn wefan fro lwyddiannus.
Medd Cadeirydd Clonc, Dylan Lewis:
“Rhaid diolch i bawb sy’n cyfrannu i’r wefan ac i gynllun Bro360 a Chronfa Goffa Dr Dewi Davies am bob cefnogaeth. Rydym yn ffodus yn yr ardal hon hefyd bod cymaint o bobl yn darllen ein straeon.”