gan
Ifan Meredith
Huw EvansMeirion Evans (Toyota GR Yaris) yn y Parc Gwasanaethu
Wedi diwrnod o gystadlu brŵd Dydd Sadwrn ar gymalau Brechfa, Llyn Brianne a Nant y Moch ynghyd â chymal Aberystwyth, mae’r criw o Seland Newydd yn yr Hyundai i20 N Rally2 yn parhau ar frig Rali Ceredigion 2024 gyda mantais o 1:18.7 dros ei wrthwynebwr, Chris Ingram.
Wedi digwyddiad ar gymal Llyn Brianne bore ’ma gyda char James Williams yn cael difrod, bu’n rhaid i’r ceir oedd yn ei ddilyn dderbyn yr un amser gan gynnwys y gyrrwr lleol o Garej Derwen, Meirion Evans. Disgrifiodd Meirion yr amser ‘nominal’ yma yn “anheg” ac felly yn “gobeithio am well ’fory”.
“Dechrau cryf bore ’ma ond problem fach wedi ein dal ni nôl”
Mae Meirion Evans yn yr 11eg safle a 2:07.9 tu ôl i Hayden Paddon ar hyn o bryd.
Bu heddiw yn ddiwrnod hir i’r criwiau gyda 8 cymmal o rasio i gyd. Yfory, bydd yna 2 gymal yn cael eu rhedeg ddwywaith, yn y bore a’r prynhawn, sef Bethania a Hafod.
Bydd cymal cyntaf Bethania yn cychwyn am 8:33yb a Hafod i ddechrau am 9:35yb a’r ail rediad ar Bethania yn dechrau am 12:01yp. Clo’r cystadlu fydd y cymal cyffro ar Hafod am 2:05yp lle cawn wybod pwy fydd enillydd Rali Ceredigion 2024.
