gan
Ohebydd Golwg360
Yn sgil y coronafeirws mae canolfannau cymunedol, sydd yn ganolbwynt i gymunedau yng Nghymru, wedi bod ynghau ers i’r cyfyngiadau ddod i rym fis Mawrth.
Heddiw cyhoeddodd y Prif Weinidog, Mark Drakeford bydd canolfannau cymunedol yn cael ailagor ddydd Llun (Gorffennaf 20).
Er bod disgwyl i rai digwyddiadau ail ddechrau yn fuan yn Neuadd Victoria yn Llanbed mae cadeirydd y neuadd wedi dweud wrth Golwg360 nad oes bwriad i ailagor yn llawn tan fis Medi.
Bydd campfeydd awyr agored, meysydd chwarae a ffeiriau hefyd yn cael ailddechrau ddydd Llun fel rhan o’r mesurau diweddaraf i godi cyfyngiadau’r coronafeirws yng Nghymru.
Roedd y Prif Weinidog eisoes wedi cyhoeddi y byddai’r rhain yn ailagor cyhyd â bod lefelau’r coronafeirws yn parhau i gwympo yng Nghymru.
Yn ôl Llywodraeth Cymru bydd modd i’r cyfleusterau yma ailagor yn raddol dros yr wythnosau nesaf.
Pwysleisiodd y Prif Weinidog, er bod y cyhoeddiad yma yn “golygu bod y llefydd hyn yn cael ailagor, nid oes gorfodaeth arnyn nhw i wneud.”
Neuadd Victoria
Eglurodd Gary Thorogood, Cadeirydd Neuadd Victoria yn Llanbed, mai “gwyliau’r haf yw’r adeg tawelaf i’r neuadd fel arfer.”
“Bu rhaid i ni ganslo’r holl ddigwyddiadau oherwydd y coronafeirws, ond rydym ni yn gobeithio ail agor yn llawn ac ail lansio fis Medi.
“Os bydd grwpiau eisiau defnyddio’r neuadd cyn hynny bydd croeso iddyn nhw wneud – cyn belled â’u bod nhw’n gwneud asesiadau risg, glanhau a diheintio.
Ychwanegodd y cadeirydd fod y neuadd wedi manteisio ar yr amser yma i wneud rhywfaint o waith cynnal a chadw.
Er hyn bu rhaid i’r neuadd roi pedwar o weithwyr ar gynllun arbed swyddi’r llywodraeth, a diffodd y gwres yn llwyr er mwyn arbed arian.
“Rydym wedi gorfod cadw’r costau i lawr, ond yn ffodus iawn o gael grant busnesau bach gan y cyngor.
“Efallai bydd rhai pethau yn ail ddechrau yn raddol dros yr wythnosau nesaf – efallai bydd defnydd o’r swyddfeydd er enghraifft – ond ein bwriad yw ail agor yn llawn fis Medi.”
“Camau gofalus”
Yn ôl y Prif Weinidog, Mark Drakeford, bydd ailagor canolfannau cymunedol yn helpu awdurdodau lleol i ddarparu cynlluniau chwarae a gofal plant yn ystod gwyliau’r haf.
Dywedodd y Prif Weinidog: “Bydd canolfannau cymunedol yn cael cynnal mwy o weithgareddau gan gynnwys helpu awdurdodau lleol i gynnal cynlluniau chwarae a gofal plant dros wyliau’r haf.”
“Er bod codi’r cyfyngiadau’n golygu bod y llefydd hyn yn cael ailagor, nid oes gorfodaeth arnyn nhw i wneud. Gallai pryd yn union maen nhw’n ailagor amrywio wrth i berchenogion asesu’u sefyllfa a gwneud y newidiadau angenrheidiol.
“Wrth i ni gymryd y camau gofalus hyn, peidiwch da chi â meddwl bod y feirws wedi gadael y tir.
“Gallai’n holl waith caled fynd yn ofer yn rhwydd iawn os na wnawn ni ddal ati i wneud ein rhan ym mhob ffordd i gadw Cymru’n ddiogel.”