gan
Rhys Bebb Jones
Tro Shiloh oedd cynnal oedfa fore Sul 25ain Gorffennaf yn dilyn cynnal oedfa yn Soar ar Sul cynta’r mis. ‘Roedd cynulleidfa deilwng o’r ddau gapel a chyfeillion o gapeli eraill yn bresennol. Cafwyd oedfa fendithiol gan John Phillips – neges obeithiol ac emynau hyfryd Watcyn Wyn. Traddodwyd gweddi amserol gan Twynog Davies a chafwyd darlleniad pwrpasol gan Rhys Bebb Jones o’r Rhufeiniaid, pennod 5, adnodau 1-11. Arweiniwyd y canu digyfeiliant gan Twynog Davies.
Croesawyd pawb gan Twynog Davies wnaeth hefyd estyn cydymdeimlad gyda’r teuluoedd sydd wedi colli anwyliaid dros y flwyddyn ddiwethaf. Talwyd teyrngedau i’r diweddar Pegi Evans, Margaret Greenstock a Nell Williams. Croesawyd Mair Joyner a Myfanwy Jones (merched Nell Williams) i’r oedfa a diolchwyd iddynt am eu rhodd garedig i Gymorth Cristnogol er cof am eu mam.
Diolchwyd i swyddogion Shiloh am y trefniadau. Cewch hanes yr oedfa a’r un gynhaliwyd yn Soar yn y cyfweliad gyda John Phillips, Twynog Davies a Huw Jenkins. Diolch yn fawr iddynt am sgwrsio gyda Clonc360.