Nid fi yw hwn
Er mwyn gadael sylw, mae angen mewngofnodi neu ymuno â’r safle.
gan
Rhys Bebb Jones
Sandra Jones (ar ran Banc Bwyd Llanbed) yn derbyn rhodd oddi wrth Rhys Bebb Jones (ar ran Clwb Rotary Llanbed)
Nans Davies a Sandra Jones yn darparu’r bagiau o fwydydd i’w dosbarthu gan Fanc Bwyd Llanbed
Silffoedd storfa Banc Bwyd Llanbed – byddant yn wag erbyn i’r Banc Bwyd ddosbarthu’r holl fagiau o eitemau i drigolion Llanbed a’r Cylch y Nadolig hwn
Cyflwynodd Clwb Rotary Llanbed rhodd o £120.49 i Fanc Bwyd Llanbed. Dyma’r arian oedd yn weddill yng Nghyfrif Elusennol Clwb Rotary Llanbed cyn bod y cyfrifon banc yn cael eu cau.
Mae’r Clwb Rotary yn falch iawn o gefnog’r Banc Bwyd unwaith eto. Mae’n cydnabod gwaith allweddol ac amhrisiadwy’r Banc Bwyd yn cefnogi teuluoedd ac unigolion sydd mewn angen yn Llanbed. Gwerthfawrogir eu gwasanaeth yn arbennig wrth i gostau, megis bwydydd a thanwydd, gynyddu. Mae derbyn rhoddion ariannol fel un y Clwb Rotary yn eu galluogi i brynu bwydydd angenrheidiol.
Mae’r Banc Bwyd hefyd yn ddiolchgar iawn am y rhoddion dyddiol o eitemau adewir gan y cyhoedd mewn sawl lleoliad yn Llanbed. Dymunant atgoffa pawb na ellir derbyn bwydydd ffres ac mai bwydydd mewn tuniau a phacedi sych sydd orau ganddynt. Ni ddylai’r bwydydd ychwaith fod wedi mynd heibio’r dyddiad gellir eu defnyddio.
Daw’r Clwb Rotary yn Llanbed i ben wedi 54 mlynedd o wasanaeth. Bu’n benderfyniad anodd iawn ond nid oedd yn bosibl i’r 5 aelod oedd ar ôl barhau i’w gynnal. Diolch yn fawr iawn i drigolion tref ac ardal Llanbed am gefnogi’r Clwb Rotary ers dros hanner canrif. Eich cefnogaeth alluogodd y Clwb i gynnig gwasanaeth cymunedol a chynnal gweithgareddau codi arian er budd achosion da yn lleol, yn genedlaethol ac yn rhyngwladol.