Dirgelwch y peli bychain llwydion

Mae peli bach llwyd wedi eu chwythu i bob twll a chornel strydoedd Llanbed gan adael preswylwyr yn dyfalu beth ydyn nhw ac o le ddaethon nhw.

Gwelwyd y peli ar hyd Heol y Bryn yn bennaf, yn ogystal â’r Stryd Fawr, Sgwâr Harford, Stryd y Coleg a Stryd y Bont.

Maen nhw’n edrych fel peli bach ploystyrene a ddefnyddir mewn bagiau ffâ, ond o liw llwyd.  Maen nhw’n ysgafn fel peli bagiau ffâ hefyd oherwydd fe’u chwythir i bob twll a chornel.

Mae sawl un o breswylwyr Llanbed yn achwyn eu bod wedi eu chwythu mewn i dai hefyd wrth i’r drysau fod ar agor ddoe.

Ond mae yna bryder o lygredd hefyd.  Beth ydyn nhw, polystyrene neu blastig?  A beth yw’r canlyniadau tymor hir os ydyn nhw’n mynd i’r pridd a llygru gerddi a bywyd gwyllt?  Ydyn nhw’n fioddiraddadwy?  Mae’n nhw wedi eu chwythu i’r draeniau hefyd gyda’r perygl o’u blocio neu hyd yn oed lygru afonydd a’r môr yn y pen draw.