gan
Dylan Lewis
Yn gynnar brynhawn ddoe, diffoddodd y cyflenwad trydan yn ardaloedd Silian, Betws Bledrws a Llangybi a effeithiodd ar rhwng 300 ac 800 o gartrefi. Hysbyswyd y National Grid am 3.15 o’r gloch.
Yn ôl adroddiadau gan rai cwsmeriaid a gysylltodd â’r National Grid, problem foltedd uchel oedd hyn a’r rheswm dros y ffaith bod y trydan yn mynd a dod oedd bod peiriannwyr yn ceisio dargyfeirio trydan i’r ardal.
Cafwyd addewid gan y National Grid yn y lle cyntaf y byddai’r trydan nôl erbyn 5 o’r gloch. Ond ymddengys fod y broblem yn waeth nag y rhagdybiwyd. Cafwyd ail addewid y byddai’r trydan wedi ei adfer erbyn 8 o’r gloch ac yna erbyn 11 o’r gloch.
Bu colli cyflenwad trydan yn drafferth i lawer yn yr ardal yn enwedig i ffermwyr. Clywyd y bu’n rhaid i sawl fferm ddefnyddio generaduron i redeg peiriannau godro.
Dywedodd y cynghorydd Eryl Evans,
“Ddim yn siwr be yw’r broblem ond maent yn gweithio’n galed i’w datrys.”