gan
Dylan Lewis
Llun y teulu oddi ar raglen Cefn Gwlad, S4C.
Faint ohonoch chi wyliodd rhaglen Cefn Gwlad ar S4C nos Lun? Roedd yn raglen arbennig iawn yn dilyn John Dalton yn ffermio yng Ngelligarneddau, Llangybi a rhedeg busnes gwerthu cwods yn Nhalsarn.
Yn ogystal â hynny gwelwyd Ifan Jones Evans y cyflwynydd yn mentro mewn i gar rali John a dangoswyd aelodau eraill y teulu gan gynnwys Margaret Dalton ei fam wrth eu gwaith hefyd. Mor hyfryd hefyd oedd gweld Ffion Dalton ei wraig a’r pum plentyn yn rhan mor annatod o bob dim.
Mewn negeseuon ar facebook cytuna llawer nad oedd awr o raglen yn ddigon gan mor ddiddorol ac amrywiol oedd hi.
Dyn prysur yw John, ond roedd yn siarad yn naturiol a gonest a chafwyd y doniol a’r dwys ganddo.
Dywedodd Elin Jones AS,
“Newydd ddal lan gyda’r rhaglen yma. Am deulu anhygoel yw’r Daltons. Dwi’n nabod Mrs Dalton ers blynyddoedd a ma hi’n hero. Ond ma’r teulu’n dair cenhedlaeth o heroes. Rhaglen llawn emosiwn a hiwmor. Tonic o raglen. Da iawn chi i gyd. A da iawn Ifan am adael stori a chymeriadau’r teulu yma i lywio’r rhaglen.”
Gellir ailwylio’r rhaglen ar wefan S4C Clic. Diolch am gael y cyfle i werthfawrogi cyfraniad teulu unigryw’r Daltons i’r ardal leol.