Beirdd lleol yn cyhoeddi llyfr

Mae gan ardal Clonc ei llyfr barddoniaeth ei hun ar ôl lansio cyfrol arbennig yn Llanbed neithiwr (nos Iau, 22 Mawrth).

Roedd Festri Brondeifi’n llawn wrth i feirdd a chefnogwyr ddod at ei gilydd i ddathlu cyhoeddi ‘I Gofio’r Gaeafau’ – casgliad o gerddi gan ddosbarth barddol y Prifardd Idris Reynolds.

Pobol leol yw pob un o’r beirdd sydd â gwaith yn y gyfrol a’r cyfan yn bosib oherwydd yr arian a adawodd un ohonyn nhw, y diweddar Ann Rhys, yn ei hewyllys.

‘Ewyllys’ – arian a llawer mwy

Roedd y gair “ewyllys” yn llawn ystyr, yn ôl Euros Lewis, cyflwynydd y noson lansio.

“Mae’r rhodd ariannol yn galluogi rhywbeth i ddigwydd ac yna’r rhodd o weledigaeth sydd yn deisyfu bod rhywbeth yn digwydd,” meddai.

Ac fe newidiodd ychydig ar linell enwog R. Williams Parry wrth ddweud mai “cyd-ddyheu a’i cyhoeddodd hi” – gwaith y dosbarth gyda’i glydd oedd wedi arwain at y gyfrol a phob dimai o’r arian gwerthiant yn mynd at Ymchwil y Galon, Ceredigion.

Amrywiaeth

Mae’r gyfrol yn cynnwys amrywiaeth fawr o waith, gan gynnwys sawl cerdd gan Ann Rhys ei hun ac mae yno delynegion, limrigau, caneuon, penillion, cywyddau ac englynion.

Mae un englyn gan un o nofelwyr mwya’ Cymru, Islwyn Ffowc Elis, a oedd yn un o aelodau cynnar y dosbarth.

Fe soniodd Idris Reynolds fel yr oedd y dosbarth wedi’i ddechrau gan Roy Stephens o Brifysgol Aberystwyth ac yntau wedi cymryd yr awenau pan fu Roy Stephens farw.

Fe fu’n rhaid iddyn nhw symud o Goleg Llanbed oherwydd mai cwrs dan adain Aberystwyth oedd e ac yn y diwedd fe gawson nhw eu “cartref ysbrydol” yn Festri Brondeifi.

Fe fu llawer o hel atgofion yn ystod y lansio a’r teitl yn atgoffa pawb mai tros y gaeaf yr oedd y dosbarth yn cwrdd.

Roedd pump o’r beirdd yno i dderbyn y copïau cynta’ o’r gyfrol gan Roy Davies, gweddw Ann Rhys.

Mae I Gofio’r Gaeafau ar gael o Siop y Smotyn Du am £5.