Blwyddyn yn ôl prin ‘roeddwn wedi clywed am Zoom. Ni allaf bellach ddychmygu bod hebddo! Defnyddiaf bron yn ddyddiol ac yn arbennig ar y Sul. Mae’n fy ngalluogi i ymuno mewn oedfaon lleol megis rhai Cylch Bedyddwyr Gogledd Teifi, Gofalaeth Caron (Eglwys Bresbyteraidd Cymru – EBC) a Chapel Bethel (Annibynwyr) Parc-y-rhos ger Cwmann. Caf hefyd ymuno ag oedfaon y tu hwnt i’m milltir sgwâr megis rhai Gofalaeth Pwllheli (EBC) ar nos Sul.
Oni bai am Zoom, byddwn hefyd yn colli’r cyfle i ymuno gydag eraill am 12.00 ar brynhawniau Gwener i weddïo ‘dros eraill, ein byd, ein hunain’. Trefnwyd gan EBC i ddod â Christnogion at ei gilydd oddi wrth brysurdeb bywyd a’n byd helbulus.
Yng ngeiriau’r Parchedig Marcus Robinson, Llywydd Cymanfa Gyffredinol EBC, mae’n ‘gyfle i nifer agosáu at orsedd gras yr un pryd, gan ddyheu i’r Arglwydd weithio’n nerthol yn ein plith’. ‘Rwy’n ymuno tan arweiniad y Parchedig Bryn Williams (Gofalaeth Pwllheli) a chawn gyfle yn ein tro i gyflwyno ein gweddïau. Effaith y coronafeirws ar deulu, ffrindiau a’n cymunedau sydd wedi llywio ein gweddiau’n ddiweddar. Os hoffech ymuno am 12.00 prynhawniau Gwener, cewch mwy o wybodaeth yn erthygl y Parchedig Marcus Robinson yn Y Goleuad, rhifyn Tachwedd 6, 2020, tudalen 7.
Mae Zoom hefyd yn caniatáu i mi ymuno’n wythnosol yn Astudiaeth Feiblaidd Gofalaeth Caron tan arweiniad y Parchedig Carwyn Arthur ac yn fisol yn y Dosbarth Pregethu arweinir gan y Parchedig Bryn Williams. Mae cyfle hefyd i ymuno ar Zoom yn Ionawr, Chwefror a Mawrth mewn cyfres o astudiaethau ar Salm 23 dan y teitl ‘Dewch at y Bwrdd’:
Cewch mwy o wybodaeth gan Mrs. Sarah Morris – ei chyfeiriad e-bost yw sarah.morris@ebcpcw.cymru
‘Rwy’n meddwl bod cerdd Casia Wiliam, ‘Duw ar Zoom’, yn cyfleu’n drawiadol sut yr ydym yn parhau i addoli yn y cyfnod presennol:
‘Rhywsut aeth Duw yn ddiarth.
Rhwng y naw tan bump a plant i’w gwlâu a gwaith yn galw
doedd dim lle iddo yn sêt fawr fy mywyd.
Bob hyn a hyn dôi yn ôl yn annisgwyl
wrth i mi lenwi troli, neu lyncu’r Ê ffôr sefnti
ond wastad â chymun o euogrwydd
am beidio twyllu ei dŷ cyhyd.
Ond rŵan, a ninnau yng nghanol
y tywyllwch tywyllaf,
dyma fo, ar fy nglin,
lond y sgrin,
lond y gegin.
Duw ar Zoom.
A ffasiwn sinig, mi daerwn y byddwn
wedi mynd am y groes yn syth,
ond na, arhosais ennyd
i glywed adnod,
i geisio ei lais eto,
i weld os medrwn estyn croeso iddo
yn fy nhŷ fy hun.
Ac yn lle’r festri oer a chwech yn gwmni
dyma lond y we o gwmpeini;
a dros goffi,
mewn pajamas,
yn ein gwlâu ella,
daeth y ne’ atom ni.
O dro i dro,
rŵan ei bod hi’n dechra g’leuo,
wrth i mi osod bwrdd neu
hel llestri brecwast,
mewn eiliad o heddwch,
mi ga i ryw air bach efo fo
a mae o’i weld ddigon bodlon
i ni gwrdd fel hyn,
yn bytiog rhwng prydau,
a minnau heb ddim byd am fy nhraed.’