gan
Dylan Lewis
Heddiw cyhoeddodd Anwen Butten ei bod yn ymddeol o gynrychioli Cymru mewn bowls.
“Pan chi’n gwybod, chi yn gwybod,” meddai Anwen. “Mae’n amser i gyhoeddi bo fi yn gorffen bowlio ym mhencampwriaethau i Gymru.”
Ychwanegodd Anwen ar facebook, “Mae wedi bod yn wych, ac rwy’n falch o fy holl lwyddiannau a chyflawniadau. Er gwaethaf sawl her ar hyd y ffordd rwyf wedi bod wrth fy modd yn cynrychioli Cymru am yr 20 mlynedd diwethaf ar y lefel uchaf.”
Bu Anwen yn bowlio yng Ngemau’r Gymanwlad ym Mirmingham yr wythnos ddiwethaf a hi oedd capten tîm Cymru. O ganlyniad i hyn methodd fynychu’r Eisteddfod Genedlaethol yn Nhregaron lle roedd i fod cael ei hurddo i’r Orsedd.
Ond ni fydd Anwen yn rhoi’r gorau i’r gamp yn llwyr. “Gobeithio un diwrnod, bydda i’n cael cyfle i roi rhywbeth yn ôl i’r gamp dwi’n ei charu.” dywedodd Anwen.
“Diolch yn fawr i bawb sydd wedi fy nghefnogi. Chi’n gwybod pwy ydych chi.”
Postiodd Anwen ddau lun hyfryd uchod o hi a’r teulu o dan y teitl “Ddoe a Heddiw… Manceinion 2002 – Birmingham 2022.”.
Llongyfarchiadau enfawr i Anwen ar ei holl gyrhaeddiadau bowls.