Arddangosfa Celf a Chrefft Llanfair Clydogau, 18fed hyd 21ain Awst

Dewch i ryfeddu at ddoniau celf Aerwen Griffiths, Cynthia Westney, Sarah Jones, Dodie a Jamie Herschel, Sue Powell, Sue Clow, Ali Scott a Claire Parsons yn Llanfair Clydogau.

Cynhelir arddangosfa o’u gwaith yn Neuadd Pentref Llanfair Clydogau rhwng dydd Iau 18fed a dydd Sul 21ain Awst. Bydd y neuadd ar agor rhwng 11.00 y bore a 6.00 yr hwyr (11.00 hyd 8.00 dydd Gwener) i fwynhau gwahanol gyfryngau yn gerameg, ffelt, ysgythriadau, printiau leino, colograffiau, acrylig, dyfrlliw, tecstilau a media cymysg. Cyfle dros baned o de neu goffi a chacen i gyfarfod gyda rhai o’r arddangoswyr i drafod a phrynu eu gwaith.

Mi wnaeth sawl un ohonynt arddangos eu gwaith yn Nhregaron yn ystod wythnos Eisteddfod Genedlaethol Cymru Ceredigion. Gobeithio i chi ymweld â’r Lle Celf ar y Maes a hefyd yr arddangosfa ardderchog gynhaliwyd rhwng 28ain Gorffennaf a 7fed Awst yn Neuadd Goffa Tregaron. Yno gwelwyd gwaith Aerwen Griffiths, Ali Scott a Sarah Jones fydd hefyd yn Arddangosfa Celf Neuadd Pentref Llanfair Clydogau, sy’n agor dydd Iau 18fed Awst am 11.00 y bore.

Y mae dal cyfle i ymweld â’r arddangosfa gelf yng Nghanolfan Rhiannon, Tregaron (www.rhiannon.co.uk). Cewch yno weithiau celf Philip Huckin, Julia Elliot, Colin Kellam ac Wynne Melville Jones ymhlith arlunwyr eraill. Yno hefyd mae rhai enghreifftiau o ddawn y diweddar Ogwyn Davies a chyfrol sydd newydd ei chyhoedd gan Ceri Thomas, ‘Bywyd a Gwaith Ogwyn Davies A Life in Art’. Os ydych yn Aberystwyth, mae cyfle i weld arddangosfa o waith Ogwyn Davies yng Nghanolfan y Celfyddydau tan ddydd Llun 12fed Medi.

Bu cyfle hefyd yn ystod wythnos yr Eisteddfod Genedlaethol i weld yr arddangosfa yn Eglwys St. Caron, Tregaron a’r ffenestri lliw hardd yr eglwys hynafol sy’n dyddio o tua 1500. Cafwyd croeso hyfryd yno a mwynhau’r arddangosfa o’r enwogion sydd â chysylltiadau ag ardal Tregaron. Defnyddiwyd siliau’r ffenestri i dynnu sylw at Moc Morgan (Pontrhydfendigaid), W. Ambrose Bebb a’i frawd Albert Bebb (Camer Fawr, Tregaron) a Cassie Davies (Blaencaron, Tregaron) ymhlith eraill. Dysgais lawer amdanynt gan gynnwys am George Noakes, Archesgob Cymru 1987-1991, ganed ym mhentref Bwlchllan ger Tregaron.

Mwynhewch y lluniau o’r arddangosfeydd yn Neuadd Goffa Tregaron, Canolfan Rhiannon ac yn Eglwys St. Caron.

Pob dymuniad da i’r Arddangosfa Celf a Chrefft yn Neuadd Pentref Llanfair Clydogau, 18fed hyd 21ain Awst.