gan
Dylan Lewis
Ar ddydd Gwener urddwyd y fowlwraig cenedlaethol Anwen Butten i’r wisg las yng Ngorsedd Cymru. Dywedodd Anwen,
“Adre ar ôl cwpwl o ddiwrnodau arbennig lan yn y Gogledd. Diolch i bawb sydd wedi danfon cyfarchion ar ôl i fi gael fy urddo i’r ‘Orsedd’ ddoe. Am ddiwrnod hyfryd ac mor falch i fy nheulu a ffrindiau fy mod wedi derbyn yr anrhydedd yma. Balchder mawr.”
Roedd Anwen i fod cael ei hurddo yn Eisteddfod Ceredigion y llynedd yr un pryd â Mary Davies ac Ann Bowen Morgan, ond cynhaliwyd Gemau’r Gymanwlad ym Mirmingham yr un pryd. Hyfryd oedd gweld y llun uchod o’r dair yn eu gwisgoedd glas yn Eisteddfod Llŷn ac Eifionydd.
Cyhoeddwyd ar wefan Gorsedd Cymru,
Bowls sy’n mynd â bryd Anwen Butten, Llanbedr Pont Steffan, ac mae’r Orsedd yn falch o’r cyfle i’w hanrhydeddu am ei chyfraniad arbennig i’r gamp honno dros gyfnod o 30 mlynedd. Hi oedd Capten Tîm Cymru yng Ngemau’r Gymanwlad yn 2022. Mae Anwen hefyd yn nyrs arbenigol cancr y pen a’r gwddf yn Ysbyty Glangwili, gan weithio ar draws ardal Bwrdd Iechyd Hywel Dda.
Felly, llongyfarchiadau mawr Anwen a diolch am gynnwys enw dy bentref yn dy enw gorseddol sef Anwen o Gellan.