gan
Rhys Bebb Jones
Llun gan Andrew Edwards (Barcud)Ben Lake AS a’r Cynghorydd Rhys Bebb Jones, Maer Llanbed yn agor yr ardd yn swyddogol.
Llun gan Andrew Edwards (Barcud)Y gynulleidfa yn yr agoriad swyddogol gyda Ben Lake AS, Kim Stoddart a’r Cynghorydd Rhys Bebb Jones, Maer Llanbed yn y rhes flaen.
Kim Stoddart (ar y dde) gyda rhai o’r gwirfoddolwyr sydd wedi trawsnewid yr ardd.
Yr ardd wedi ei thrawsnewid.
Yr ardd ar ei newydd wedd gyda’r ardal sefydlwyd i ddenu pryfetach (canol y llun).
Yr ardal sefydlwyd yn yr ardd i ddenu pryfetach.
Mae’r ardd yng Nghanolfan Creuddyn yn cael ei thrawsnewid yn ardd gymunedol, diolch i bartneriaeth rhwng Barcud (perchnogion Creuddyn), Banc Bwyd Llanbed (mae eu swyddfa yn y Creuddyn) a’r arddwraig Kim Stoddart. Mae yna grŵp lleol o wirfoddolwyr brwdfrydig yn cynorthwyo’n wythnosol yn sefydlu’r ardd. Maent yn cyfarfod yn rheolaidd yn y Creuddyn ers mis Mawrth 2022 tan arweiniad Kim i ddysgu am arddio a thyfu cynnyrch yn organig.
Mae Kim yn dangos i’r gwirfoddolwyr sut i blannu a gofalu am blanhigion o bob math – a chael hwyl wrth wneud hynny. Mae’n darparu’r holl ddeunyddiau angenrheidiol, yn offer, potiau, gwrtaith a phlanhigion. Dysgir beth ellir ei dyfu mewn gwahanol fathau o briddoedd ac am rinweddau gwahanol berlysiau a sut i’w tyfu megis mintys, oregano, persli, saets a theim. Dysgir hefyd sut i dyfu corpwmpenni, letys, moron a phys yn ogystal â chyrens duon, mafon a mefus. Mae’n gyfle i’r gwirfoddolwyr rhoi ar waith yn eu gerddi gartref yr hyn a ddysgir gan Kim.
Mae yna goed ffrwythau hefyd yn tyfu yng ngardd gymunedol y Creuddyn. Bydd y ffrwythau fel gweddill cynnyrch yr ardd yn darparu cynnyrch ffres yn ei dymor ar gyfer Banc Bwyd Llanbed. Croesewir yr ardd gan Julia Lim o Fanc Bwyd Llanbed a Bwyd Bendigedig Llanbed wnaeth gyfeirio at yr ardd yn ddiweddar yn “ardd gymunedol yn y dref, lle gall pobl weld sut mae tyfu bwyd mewn lle y mae’n hawdd gofalu amdano ac mewn ffordd sy’n golygu eu bod yn ystyried yr hinsawdd ac yn lleihau’r angen i ddyfrhau”. Bwriedir defnyddio casgen ddŵr mawr i gadw’r dŵr glaw a gesglir i ddyfrio’r ardd a defnyddir ardal yn yr ardd hefyd ar gyfer tomen gompost. Agorwyd yr ardd yn swyddogol prynhawn Gwener 28 Gorffennaf gan Ben Lake AS yng nghwmni Maer a Maeres Cyngor Tref Llanbedr Pont Steffan, y Cynghorydd Rhys Bebb Jones a Mrs. Shân Jones, Kim Stoddart a nifer o’r gwirfoddolwyr, cynrychiolwyr o gwmni Barcud ac o’r cwmnïau sydd â swyddfeydd yn y Creuddyn.
Mae datblygiad yr ardd yn y Creuddyn o ganlyniad i arweiniad a gwaith Kim Stoddart, y newyddiadurwraig, awdur, dylunydd gerddi a’r hyfforddwraig arddwriaethol. Mae’n byw yng Ngheredigion ac wedi bod yn ysgrifennu ar gyfer cyhoeddiadau fel The Guardian a chylchgrawn Gardeners’ World ers 2013. Mae’n angerddol am ddefnyddio dulliau garddio a thyfu bwyd yn gynaliadwy. Mae gwarchod yr amgylchedd yn bwysig iddi yn arbennig yn sgil yr heriau newid hinsawdd. Mae’n gyd awdur y llyfr ‘The Climate Change Garden’ ac mae’n addysgu ar draws Gwledydd Prydain ac i sefydliadau megis Garden Organics, y Gymdeithas Arddwriaethol Frenhinol a Gardd Fotaneg Genedlaethol Cymru. Ym mis Rhagfyr 2022 dyfarnwyd Gwobr Gerddi’r Flwyddyn Beth Chatto iddi yng Ngwobrau Garden Media Guild. Ceir rhagor o wybodaeth am Kim a’i gwaith o ddilyn y ddolen: www.greenrocketcourses.com
Os ydych am fwy o wybodaeth am y gweithdai garddio yn y Creuddyn, cysylltwch gyda Sara Jones, Swyddog Cyfleusterau Creuddyn. Ei chyfeiriad e-bost yw creuddyn@barcud.cymru a’i rhif ffôn yw 01570 421795. Os am wybod mwy am weithgareddau eraill a drefnir ac am y cyfleusterau arbennig yn y Creuddyn, cysylltwch gyda Sara Jones.