Nid fi yw hwn
Er mwyn gadael sylw, mae angen mewngofnodi neu ymuno â’r safle.
gan
Ohebydd Golwg360
Blog byw am yr effeithiau a’r datblygiadau diweddaraf ynghylch Covid 19 yn ardal Clonc360.
Dyma gyfle i chi rannu diweddariadau pwysig am ddigwyddiadau a gweithgareddau ar lawr gwlad, a chasglu’r enghreifftiau o bobol sy’n gwneud pethe positif dros eraill yn ein cymunedau.
- Gohirio digwyddiadau, ond llu o drigolion yn ein pentrefi a threfi yn dechrau system cyfaill i helpu’r henoed a’r rhai mewn angen.
Darpariaeth gofal plant i weithwyr gwasanaethau rheng flaen yng Ngheredigion
20 Mawrth 2020
Mae trefniadau yn cael eu rhoi ar waith er mwyn darparu gwasanaethau gofal plant i weithwyr rheng flaen yng Ngheredigion.
Yn dilyn y cyhoeddiad y bydd ysgolion yn cau o fewn y Sir, mae angen gwasanaethau gofal plant er mwyn sicrhau parhad y gwasanaethau rheng flaen.
I ddechrau, Cyngor Sir Ceredigion yn ystyried mai gweithwyr y Gwasanaeth Iechyd, yr Heddlu, y Gwasanaeth Tân, Gwasanaethau Cymdeithasol neu Wasanaethau Gofal yw’r gwasanaethau rheng flaen. Mae gweithwyr y Gwasanaethau Gofal yn cynnwys gweithwyr yng nghartrefi gofal y Cyngor, cartrefi preifat yr awdurdod, a’r rheini sy’n darparu gofal cartref yng nghartrefi pobl o fewn yr awdurdod. Byddwn yn adolygu hyn yn unol â chyngor Llywodraeth Cymru.
Mae pum lleoliad ar draws Ceredigion a fydd yn darparu gofal plant o ddydd Llun ymlaen, sef y canlynol:
- Canolfan Integredig Plant (Canolfan Enfys Teifi)
- Ysgol Gynradd Aberaeron
- Ysgol Dyffryn Cledlyn, Drefach
- Ysgol Y Dderi, Llangybi
- Ysgol Gymraeg Aberystwyth
Bydd y gwasanaeth ar gael saith diwrnod yr wythnos rhwng 8.00am a 6.00pm hyd nes y bydd yr ysgolion yn ail-agor. Bydd disgwyl i rieni ddarparu pecyn bwyd i’w plant oherwydd ni fydd y gwasanaeth yn darparu bwyd. Gall y lleoliadau newid yn amodol ar y galw.
Nid disodli’r gwasanaeth a ddarperir gan ddarparwyr gofal plant preifat yw bwriad y gwasanaeth, ond cynyddu’r capasiti pan fydd ysgolion yn cau ddydd Gwener.
Mae rhieni’n gallu cofrestru ar gyfer y gwasanaeth yn electronig ac archebu’r sesiynau sydd eu hangen arnynt ar sail wythnosol. Am ragor o wybodaeth ac er mwyn cofrestru, ewch i’r wefan: https://www.ceredigion.gov.uk/preswyliwr/gofal-plant-i-weithwyr-allweddol/
Mewn cyfnod diflas lle mae pob gweithgaredd yn cael ei ohirio oherwydd y Coronafeirws, mae gan CFfI Ceredigion rywfaint o newyddion da!
Bydd enwau swyddogion newydd y mudiad am y flwyddyn nesaf, sef y Ffarmwr Ifanc, y Frenhines a’u Dirprwyon, yn cael eu cyhoeddi ar Facebook am 7yh heno.
?CYHOEDDI SWYDDOGION ?Gan na fydd Dawns Dewis Swyddogion heno, mi fyddwn yn cyhoeddi swyddogion newydd y Sir ar ein…
Posted by Cffi Ceredigion Ceredigion Yfc on Friday, 20 March 2020
Mae’n gyfnod anodd iawn ar hyn o bryd i bawb ond mae CFFI Llanllwni yma i helpu’r gymuned os oes angen.
Gwirfoddolwyr wedi eu lleoli yn ardaloedd Llanllwni, Maesycrugiau, Llanybydder, New Inn a Phencader.
Peidiwch ag oedi i gysylltu!
Dyddiad derbyn newyddion a lluniau ar gyfer rhifyn Ebrill Papur Bro Clonc yw Dydd Llun 23ain Mawrth ac anogwn bawb i ddanfon eu newyddion yn gynnar yn yr un ffordd ag arfer.
Gwelwn fod cyhoeddi Papur Bro Clonc cyn bwysiced yn y cyfnod anodd hwn nag erioed. Teimlwn y gall Clonc leddfu ychydig ar y profiad o hunan ynysu rhag y Coronafeirws.
Ond oherwydd y perygl o ledu’r haint ni allwn ofyn i wirfoddolwyr gynorthwyo gyda’r plygu na’r dosbarthu yn ystod y misoedd nesaf. Felly bwriadwn gyhoeddi rhifyn digidol yn unig.
Gellir darllen y rhifyn nesaf ar eich ffôn / llechen / cyfrifiadur ar wefan www.clonc.co.uk
Bydd ar gael drwy’r byd i gyd.
Gallwch argraffu copïau eich hunain ar gyfer eraill sydd heb offer digidol.
Bydd y copi digidol am ddim ar y we a ni fydd rhaid mynd i’r siop i’w brynu.
Neges gan Ganolfan Hamdden a Phwll Nofio Llambed.
Rydym wedi trafod y sefyllfa bresennol fel swyddogion ac arweinyddion ac yn sgil cyngor wrth y Sir ac NFYFC i ohirio unrhyw weithgaredd CFfI am 12 wythnos rydym wedi penderfynu gohirio’r Cinio Dathlu oedd i’w gynnal ar 13 o Fehefin.
Gobeithiwn yn fawr y gallwn aildrefnu’r cinio yn hwyrach yn y flwyddyn a bydd unrhyw docynnau sydd eisoes wedi eu harchebu/ prynu i’r cinio yn ddilys ar gyfer y dyddiad newydd.
Gwerthfawrogi yn fawr os byddai modd i chi lledaenu’r neges mor eang â phosibl.
Gyda thristwch mae pwyllgor Sioe Amaethyddol Llanbedr Pont Steffan wedi penderfynu canslo’r digwyddiad eleni yn unol â sefydliadau tebyg eraill. Rhannwch y cyhoeddiad hwn os gwelwch yn dda.
Yn anffodus, o achos Covid 19 rhaid gohirio Eiteddfod Gadeiriol Capel y Groes ger Llanwnnen tan y flwyddyn nesa.
Mae aelodau CFfI Cwmann ar gael i helpu unrhyw un sydd angen cymorth o fewn y gymuned gyda siopa bwyd, casglu meddiginiaeth a sgwrs ffon.
Mae dyddiad cau newyddion rhifyn Ebrill Papur Bro Clonc Dydd Llun nesaf 23ain Mawrth. Danfonwch eich newyddion a’ch lluniau atom.
Ond a fydd cynhyrchu’r papur yn bosibl? Beth am blygu a dosbarthu yng nghysgod y Coronafeirws?
Beth am y gwerthiant? Gallwn wynebu tipyn o golled.
Ar y llaw arall bydd mwy o alw nag erioed am ddeunydd darllen oherwydd yr hunan ynysu.
Mwy o fanylion i ddilyn.